Wed, 08 Apr 2020

Hiligaynon News: PUI sa COVID ' 19 sakop na sang PhilHealth package

Philippine Information Agency
27 Feb 2020, 22:38 GMT+10

SYUDAD SANG ROXAS, Capiz, Pebrero 27 (PIA) - Ginpahayag ni Joe Frederick Diaz nga hepe sang Philippine Health Insurance Corporation (PhilHealth) sa Capiz nga aprobado na sang Board of Director sang PhilHealth ang P14,000.00 nga benefit package para sa mga PhilHealth - member nga mangin Patient Under Investigation sa Coronavirus Disease ukon COVID - 19 nga ma-admit sa mga ospital agud ma-quarantine kag mabulong sa balati-an.

Gindugang pa ni Diaz nga may dugang pa nga P4,000.00 nga referral package ang PhilHealth kon ang pasyente ang mag-positibo sa COVID - 19 kag kinahanglan nga dal-on sa DOH - accredited nga ospital para sa lubos pa gid nga pagbulong kag mas mataas nga lebel sang quarantine

Ang ginpasangkad nga benefit package kaangot sa coronavirus infection ang ginasaad sa PhilHealth Circular 2020 - 0004.

Samtang naka-rekord ang Provincial Health Office sang PUI No. 8 sa COVID - 19 sa probinsya sang Pebrero 26 kag ginapaidalum sa quarantine sa pribado nga ospital ang pasyente nga 45 anyos nga OFW nagikan sa Hong Kong.

Ang ikawalo nga PUI ang nagpakonsulta sa doktor bangud sang ubo kag pagpangatol sang tutonlan apang gin-rekomenda na nga magpa-admit kag ipaidalum sa hospital quarantine.

Matandaan nga ang nauna nga pito ka mga PUI sa probinsya ang nag-negatibo sa COVID - 19 base sa resulta sang laboratory examination sang RITM sa Muntinlupa City.

Matandaan nga ginarekomenda ni Dr. Samuel Delfin nga Provincial Health Officer sang Capiz sa mga indibidwal nga nagpadulong sa China kag mga teritoryo nga sakop sang China nga gilayon nga magpakigkita sa ila natungdan nga mga Local Health Office sa pagbalik sa probinsya.

Kalakip man sa ginahingyo sang mga PHO amo ang pag-obserba sang mga buluhaton sa pagpugong kag pagpaiway sa pag-angkon sang virus kapareho sang masami nga paghugas sang mga kamot, egsakto kag kon kinahanglan nga pagamit sang face mask, regular nga pag-tsek sang temperatura sang lawas, paglikaw sa mga lugar nga ginatiponan sang katawhan kag pagpaiway nga matandog ang guya sang mahigko nga mga kamot. (JSC/AAL/PIA Capiz)

More China News

Access More

Sign up for China News

a daily newsletter full of things to discuss over drinks.and the great thing is that it's on the house!